आपराधिक लाभ कसुरमा फरार रहेकी निलम्बित इन्स्पेक्टर जिल्ला अदालत ललितपुरमा हाजिर भएकी छन् ।प्रहरीको फरार सूचीमा रहेकी शाही आइतबार बिहान ललितपुर जिल्ला अदालतमा उपस्थित भएकी हुन् ।
उनी प्रहरी प्रभाग भैंसेपाटीमा कार्यरत रहेको बेला एक जना व्यवसायीलाई बलात्कार मुद्दामा फसाइदिने भन्दै हनिट्र्याप समूहसँग मिलेर रकम असुलेको आरोप छ ।
यस प्रकरणमा जिल्ला अदालत ललितपुरले ताजमूल इस्लामलाई पुर्पक्षका लागि थुनामा पठाउन आदेश दिएको थियो ।
त्यस्तै, प्रहरी हवल्दार महेन्द्र हमाललाई तारेखमा, सुस्मा विकलाई दुई लाख र भिमादेवी थापालाई एक लाख धरौटीमा छाड्न आदेश दिएको थियो ।
निलम्बित शाही र अर्का एक जना पुरूष भने फरार नै रहेका थिए । प्रकरणमा उनीहरूमाथि मिलेमतोमा एक व्यवसायीलाई बलात्कारको मुद्दामा फसाउने भन्दै ३० लाख रुपैयाँ लेनदेन गरेको खुलेको थियो ।
घटनाबारे डिएसपी नरहरि अधिकारीको नेतृत्वमा प्रारम्भिक छानबिन भएको थियो । उक्त समितिले शाहीमाथि मुद्दा चलाउन सिफारिस गरेको थियो ।
थप अनुसन्धानका लागि मुद्दा केन्द्रीय अनुसन्धान ब्युरो (सिआइबी) मा पठाइएको थियो ।
