नेपाली बजारमा आज (बुधबार) सुन–चाँदीको मूल्य घटेको छ।

गत शुक्रबारदेखि सुनको मूल्यले नयाँ रेकर्ड बनाइरहेको सुन मंगलबारको तुलनामा प्रतितोला ६ सय रूपैयाँ घटेको हो ।

नेपाल सुनचाँदी व्यवसायी महासंघका अनुसार आज छापावाल सुन प्रतितोला एक लाख ७९ हजार एक सय रूपैयाँमा कारोबार भइरहेको छ । मंगलबार छापावाल सुन प्रतितोला एक लाख ७९ हजार सात सय रूपैयाँमा कारोबार भएको थियो ।

यस्तै, यस दिन चाँदीको मूल्य प्रतितोला दुई हजार २० रूपैयाँमा कारोबार भइरहेको छ । मंगलबार चाँदी प्रतितोला दुई हजार ३५ रूपैयाँमा कारोबार भएको थियो । 

यो मूल्य अघिल्लो दिनको तुलनामा प्रतितोला १५ रूपैयाँ घटेको हो ।

अन्तर्राष्ट्रिय बजारमा आज सुन प्रतिऔंस तीन हजार ११६ अमेरिकी डलरमा कारोबार भइरहेको छ ।